الأربعاء، 17 مايو 2017

ميكروباااااااااظ


بما اني بقيت خبيرة في ركوب الميكروباصات الشهيرة بالميكروباظات انصحكم بالاتي
1-اوعوا تركبوا جنب اي ست كبيرة عشان هتتعامل معاكم كانها عرفاكم من زمان وهاتك يارغي في اي كلام عن عيالها وحالها والاسعار ويمكن تدخل في مواضيع متتخيلوهاش
2-اوعوا تركبوا جنب راجل كبير هيتعامل معاكم انه محلل عادي بقا وانتي زي بنته وهيفرش نفسه كانه قاعد في بيتهم وهتسمعي .. معلش يابنتي
3-اوعوا تركبوا جنب ست متسوقه وجايه حالا من السوق عشان هتلاقي شنط الخضار وبقدرة قادر بقت علي رجلك انتي كان التسويقه دي بتاعت بيتكم
4-اوعي تركبي جنب واحده شايله شنطه وفي ايديها التانيه عيل اعرفي انك ياما هتشيلي الشنطه او العيل الصغير
5-اوعي تركبي جنب عيال راجعه من الدرس ومهنجين هيفضلوا يضحكوا علي الفاضيه والملاينه لحد ماهتشكي في نفسك انهم بيضحكوا عليكي
6-اوعي تركبي جنب اي شاب حتي لو كان ملهوش حل وشبه توم كروز في الفتره من 12 الظهر ل4 العصر لان الوقت ده بيبقي منسوب العرق والريحه المعفنه لامؤاخده عاليه
7-اوعي تركبي جنب بنت ماسكه الموبيل وهاتك ياحب وسهوكه في الشات عشان غصب عنك عينك هتسرح وهتتحسري علي نفسك سواء كنتي سنجل او متجوزه الاتنين سواء
8-اوعي تركبي جنب السواق حتي لو اخدتي الكورسين اللي جنبه عشان هيفتكرك ساعتها بنت خال مرات عمة ست حد قريبه وهيفضل يتكلم معاكي عاااااااااادي جدا وهتجيبي لنفسك الشوبهه
9-اوعي تركبي في الكورسي اللي ورا السواق عشان كتفك بقدرة قادر هيبقي ملكيه عامه لكل اللي عاوز يدفع ورا
10-في الصيف ده والحر اركبي دايما ناحيه اليمين بيبقي مفيش شمس
11-في الشنطه معاكي لازم يبقي في منديل محطوط فيه شويه ريحه عشان الريحه بقولك معفنه في الصيف صدقيني ده انتي ممكن تحتاجي للريحه نفسها
12-لو الكراسي ضيقه ادفعي جنيه زياده وخدي الكرسي اللي جنبك وخليه فاضي
13-اوعي تنسي الريحه والله العظيم مش هتستحملي ريحة البطاط في الصيف ..
14 -متنسيش دعاء ركوب الميكروباظ يارب اكفيني هم علي جنب ياسطي ويارب بنت تركب جنبي واني ادفع لنفسي
المتمرمطه في المواصلات ..... وفااااااء
اه يااااااانا ياما

ليست هناك تعليقات:

إرسال تعليق

يهمني رأيك جدا